藝人羅霖今晚以低胸晚裝出席慈善晚宴,她接受訪問時表示很開心能參與這個幫助兔唇小朋友的慈善活動,她說:「身邊都有啲朋友有呢個痛苦嘅經歷,因為要不斷做手術,無論係家人或小朋友本身都承受好大壓力,我都希望可以盡量幫佢哋。」

羅霖又以為人母親的身份感性道:「作為生過小朋友嘅媽咪,自己都會好緊張小朋友,甚至有時覺得自己神經衰弱,當初照BB嘅時候會專登數吓啲手指腳趾齊唔齊,見到正常先會鬆一口氣。生最尾嗰胎因為年紀比較大,抽羊水要插一支好粗嘅針,古代生仔真係好痛苦,好彩依家醫學昌明可以輕鬆啲。依家自己會好努力做嘢去照顧佢哋,因為真係愈大愈多問題,例如就業、學業同情緒問題,萬一有咩問題,自己都可以幫到手嘛。我家姐冇生過小朋友,佢會覺得小朋友可以天生天養,我就覺得做媽咪、就算自己冇得食都要畀小朋友食。目前我就最擔心佢哋嘅情緒問題,因為依家有好多年輕人輕生嘅報導,驚佢哋有壓力,因為大仔比較內向,成日收埋啲嘢喺個心度,自己會盡量同佢傾多啲計,最想小朋友可以健康快樂咁成長。」

 

(on.cc)