藝人陸永同太太Reina嘅一對寶貝女陸一穎(Hannah)同陸一心(Simsim)向來都深受網友喜愛,兩公婆仲錫到佢哋燶,今日Reina就喺社交網分享一件趣事,係講陸永同囡囡Hannah玩role play,陸永就扮壞人利用貓頭鷹引誘Hannah跟佢走,點知入世未深嘅Hannah就咁畀壞人捉走咗:「最後好彩Hannah 走甩咗,一見返自己個爸爸就喊咗出嚟喇… 呢個故事教訓佢,唔好亂咁相信陌生人嘅說話,更加唔好隨便跟陌生人走!」

Reina仲上載咗Hannah攬住爸爸喊得好勁嘅相,真係見到都心痛死人,點知Reina就覺得太入戲嘅Hannah好搞笑:「個壞人係你爸爸扮嘅,婆婆就喺你哋附近,捉走你你都仲喺自己屋企,點會喊得出,我啞咗。」網民都話Hannah好可愛,仲大讚佢似乎遺傳咗爸爸嘅演藝細胞,可以考慮做吓童星先喎!

 

(IG / ON.CC)