【開展人生新一章】恭喜陳山聰﹗

曾有過一段婚姻,又同豪門千金拍過拖,嗰陣仲同契家姐伍詠薇反面,陳山聰一度眾叛親離咁滯,不過剛剛有周刊大爆,原來。。。

恭喜恭喜,恭喜陳山聰終於搵到真愛喇!佢嘅另一半,當然唔係表哥姚子羚,而係美容顧問女友Apple。今日有周刊搵咗佢哋做封面,直擊陳山聰日前靜雞雞去咗買求婚戒指——咦,咁件事咪揚晒?

Anyway,恭喜晒!已經40歲嘅陳山聰,人生其中一章,即使唔提唔講但大家都記得,係何超雲。Love=Money,當日曾經令花生價格指數爆燈。曾有過一段婚姻,又同豪門千金拍過拖,嗰陣仲同契家姐伍詠薇反面,陳山聰一度眾叛親離咁滯。

直至遇上Apple,令四失聰——事業、金錢、愛情同形象一舖清袋嘅陳山聰企番起身,當然一班老友如陳敏之等嘅支持亦非常重要。依家陳山聰唔止身形fit爆,喺無綫亦慢慢企番穩,同斷交6年嘅伍姑娘亦於今年6月破冰做番好朋友,下一步,當然係同Apple結束3年愛情短跑,開展人生新一章。

周刊報道指,2013年同超雲分手後,陳山聰已經同Apple拍拖,得到女友支持,令陳生重新起步,直頭脫胎換骨咁樣。當時陳山聰都話好感激Apple完全接受佢嘅過去,仲話一定會俾番女友一個名份,亦唔排除閃婚,始終四十歲人,都係時候結婚。

日前,陳山聰就被目擊去尖沙嘴一家首飾名店揀鑽戒,來來回回睇咗好幾轉,睇中幾隻慢慢研究,拎埋上手試戴。報道指陳山聰睇啱嘅嗰隻成15萬、鑲1卡半鑽石。咁婚期呢?據報引述陳山聰密友透露,陳生已視Apple為終生伴侶,打算明年初完成手頭工作後,就飛去外地旅行結婚喇!

(蘋果日報)